Momente frike me rastin e sfidës, e vlefshme për kualifikueset e Amerikës së Jugut për Kupën e Botës, “Katar 2022”, mes Venezuelës dhe Argjentinës. Në minutën e 27-të të pjesës së parë, Adrian Martinez shkaktoi ndaj Lionel Messit një faull shumë të keq, duke rrezikuar ta dëmtojë seriozisht numrin 30 të PSG.
Në driblimin e thatë të Messit, Martinez, në fushë nga minuta e 25-të në vend të Velazquez së dëmtuar, ndërhyri me këmbën e tij të ngritur, pra me taka, në këmbën e majtë të “Pulga”. Një ndërhyrje që mund t’i kushtonte shumë shtrenjtë ish-kapitenit të Barcelonës.
Messi qëndroi në tokë me dhimbje për rreth katër minuta, por pas ndihmës së stafit mjekësor argjentinas arriti të ngrihej dhe të kthehej në fushë. Numri 10 argjentinas luajti të gjithë ndeshjen, duke fituar 3-1, falë golave të Lautaro Martinez, Joaquin Correa dhe Angel Correa.
Me këtë rast, ndërhyrja e VAR ishte vendimtare. Pasi u ndëshkua me të verdhë pas faullit ndaj Messit, gjyqtari uruguajan Leodan Gonzalez u thirr në monitor për rishikimin e rastit dhe e ndryshoi vendimin. I dha direkt kartonin e kuq mbrojtësit venezuelian.