Një xhamie në qytetin e Bulqizës i është vënë zjarr dy herë brenda ditës së djeshme, konkretisht mbasdite dhe në darkë.
Zjarri dyshohet të jetë i qëllimshëm, por ende nuk është identifikuar asnjë person deri më tani nga ana e policisë.
Në lidhje me këtë ngjarje ka folur dhe Kryemyftiu i Bulqizës, Sejdin Strazimiri, i cili thotë se ata nuk kanë probleme me asnjë por kjo duket qartë që është e qëllimshme.
“Ne nuk kemi asnjë dyshim kush është autori apo autorët. Nuk kemi konflikte apo probleme me askënd. Kërkojmë nga strukturat shtetërore zbardhjen e ngjarjes”, tha Strazimiri.
Në vitin 1993 ish-Këshilli i Rrethit Bulqizë dha leje ndërtimi për xhaminë e qytetit. Deri në vitin 2005 objekti shërbeu si medrese. Edhe pesë vjet më vonë xhamia shërbeu si qendër trajnimi për kurse të ndryshme dhe qendër kulturore.
Pas vitit 2010 objekti u amortizua dhe Myftinia Bulqizë kërkoi legalizimin e truallit, për të ndërtuar një xhami të re, me ndihmën e donatorëve të huaj. Ngjarja e fundit, e para e këtij lloj në këtë qytet, ka ngjallur indinjatë te besimtarët e zonës.
Sipas tyre kjo xhami ka dhënë një kontribut të madh për njerëzit në nevojë. Ata kërkojnë ngjarje të tilla të ndalen dhe autorët të vihen para ligjit.